نص عذاب نصف حياة

   بص تقريبا دلوقتى جه الوقت المناسب اللى لازم نختصر فيه السكة , نختصر فيه الحكاية , نجيب اخر النكته ونضحك نص ضحكة وناكل فاست فود , نجرب نعتزل فى نص الطريق وناخد طريق جديد ونمشى فيه ونقع ونقف ونعتزل وننسحب بردك فى النص ونقرر غلط ونقرر صح ................ ومنقررش خالص  ونقف نتفرج ونسقف او ندايق ونتخنق ونمشى , وننسى اصاحبنا ونتغير ونخسر اصحابنا ونتغير , نعمل تفنيط لورق الكوتشينة ونقش مش بالشايب بالبنت ونقلب الموازين بالولد وبعدها نقطع ورق اللعب ونلعب حاجة جديدة , اهم حاجة اننا نعترف اننا عايشين نص حياة ونص تجربة ومش هنوصل لاى حاجة كاملة يعنى السكة مش زى ما بيقولك كده هنكملها للاخر , عشان الاخر بيجى ديما فى وقت متعرفوش ممكن يبقى لحظة فى ساعة فى يوم فى سنة فى سنين , لازم نكون مقتنعين بان نظرية سرعة القذف هى النظرية الوحيدة اللى ممكن نطبقها على اى حاجة وتنفع , وان مرض الصداع النصفى هو المرض الوحيد اللى ممكن تقنع بيه اى حد موجوع , وان النظر الضعيف علامة لحسن البصر , وان الاحلام اقوى مضاد حيوى , وان الامل مسكن اثاره الجانبية الموت , وان الوحده طريق لاكتشاف الروح .    
يارب اكفينا شر الوقفة فى نص الطريق