بتمطَّر ... سَفَر

زى كل يوم

لمَّا القمر يوقَّع كل النجوم من حواليه

عشان يستفرد بحتِّة السما اللى بتتكرر قدام شباكك كل يوم

و يلاعب رمشك المرسوم أصلا حزين

عشان يسرق من حلمك مترين زمن

زى كل يوم

لما النجوم بتعيد صياغة طلوعها تانى لحقَّها المسروق

من لحظة استمتاعك بالاعادة المشهدية لكل يوم

و بنفس حتِّة السما اللى بتكرر نفسها قدام شباكك

عشان تعرف تنام

بقولك

مش هكون حتِّة سما متكررة

فمتحاولش تخبِّى ف دهشتك نجمتين

بتلفهم حوالين عينيك

فيسرقوك من وعيك بان القمر مش جاى

فتنام

!!!