عن الثورة....ما حدث فى يوم سبعة وعشرين

تحية وصلاة غائب بمسجد عمر بن الخطاب بالدوحة بعد صلاة الجمعة لشهداء الثورة المصرية الذين يستحقون الدفن بمقر رئاسة الجمهورية عبرة لمن سيحكم مصر وتخليدا لدمائهم التى بذلوها من اجل الحرية والكرامة واسقاط هذا النظام الفاشى

.....

تحية للشباب الجدعان شباب بولاق وشبرا وسط البلد القاهرة تماً من خمستاشر مايو لحد المرج تحية للشباب فى مدينة نصرو العمرانية ودار السلام واكتوبر وامبابة و والهرم والمطرية

وسيناء

وكفر الشيخ

والدقهلية

وريحة اليود اللى فى اسكندرية اللى هتغطى على اى غاز مسيل للدموع

تانى برضو

تحية خاصة للسويس

للاسماعيلية

للمنايفة اللى قلبو على الكلب مبارك

لكل المصراوية اللى عايشين على ارضها او اللى خارج مصر فى الغربة وقلوبهم كلها هناك تحية للناس اللى معايا فى السكن حاليا اللى كانو بيتجمعو حوالين ميلودى افلام وقناة غنوة دلوقتى بيتجمعوا عشان يعرفو اخبار مصر عشان يفهموا

تحية خاصة للناس اللى تعبت بجد عشان تنقل الثورة للشارع

عشان تخلى مصر تنور

تحية للجنيه اللى كل ما بيرخص سعر المصرى بيزيد

تحية للبورصة اللى كل ما بتقع بتوقف الف مصرى فقير

شكرا للناس اللى هناك على الارض فى الشارع ضد قمع الامن صامدين

النهارده الواحد عمال بيحس اد ايه بيحب بلده اد ايه هو فخور اد ايه عايز يمشى فى الشارع ويقول للناس كلها انا مصرى

...

اما بعد

النهارده الامن الخاص بالعاصمة القطرية منعنا من التظاهر امام السفارة المصرية فى قطر وقدم تهديد نهائى بعد ما اتكلم معانا بحترام ان التظاهر على ارض قطر ممنوع واللى عايز يتظاهر ممكن نحجزله تذكرة ينزل بيها مصر يتظاهر هناك واللى هيتجمع امام السفارة هيتقبض عليه

قلنا اننا عايزين نقدم مطالب باسم الجالية المصرية فى قطر....برضو منعونا....

بعد نقاش طويل واكتر من محاولة وضحولنا اننا ممكن ناخد تصريح من ادارة الامن العام بوزارة الداخلية وللاسف مش قادرين نتواصل مع اى مسئول حاليا والجميع بيقولنا يوم الاحد .

وعلى اى حال الشباب متفقة على التجمع بكره فى مسجد عمر بن الخطاب هنحضر خطبة القرضاوى ونقرر هنعمل ايه.............ساعتها اكيد هنلاقى حل ...عموما كل اللى احنا محتاجينه حاليا اننا نقدر نكون على تواصل ونتجمع مع بعض بسرعة تقدر بس لو كنت عايش فى قطر وعايز تشجع بلدك زى ما خرجت فى ماتش مصر والجزاير وماتش مصر وقطر ويوم فوز قطر بتنظيم الكاس تتواصل معانا

انت المره دى مش خارج عشان تشجع بلدك كمان انت خارج تسجل صوتك اللى بيرفض استمرار النظام واستمرار مبارك واستمرار حالة الفساد والسرقة والنهب والتعاون مع الصهاينة كل لتر غاز بيروح اسرائيل الناس الغلابة اولى بيه

.....

وده واجب وطنى عليك بلغ اللى تعرفه واقنعه وهاته معاك

تابعنا هنا على الايفينت ده

وارسلنا اسمك ورقم تليفونك فى رسالة خاصة

تصبحو على ثورة